憶三叔於二二八

       下今仔是二二八，下晡利用只个歇睏个紀念日，用網路共《悲情城市》閣看--一遍，會記得頂一改看這齣電影，是讀國校个時，也就是電影拄上映彼當時，阮三叔用oo-tóo-bái載我去彰化个戲院看的，彼是我入戲園看過个第二齣電影（頭一齣是佇鹿港看个桃太郎），細漢个記才到今，干焦賰電影內面有酒家个印象niā-tiānn，省乜(siánn-mih)「二二八」，完全攏嘛袂記了了--矣！

　　若用現主時个政治用語來講，阮三叔會用得講是標準个基本教義派，毋捌聽過伊講國語，便若開喙，見講就是用臺語，一世人上氣國民黨，細漢我則讀國校三、四年个時，他就共我講恁學校个老師，攏是國民黨--个，斯當時，我哪會知影省乜國民黨，等我沓沓大漢讀大學了後，我則知影伊是按怎會按呢講。

　　即陣伊人過身嘛已經兩年較加--矣！伊無娶無後嗣，等於我就是伊个視(示/是)細，經過二十外年，閣重看一改《悲情城市》，尤其佇二二八只一日，予我感覺特別有意義，行文記念伊留予我个左翼思想，以及為臺灣犠牲个二二八英靈。

嫁娶篇

我用教育部的規範用字共原作重新整理：

嫁娶篇

嫁著骨力翁　仝心致富三五冬
嫁著貧惰翁　火燒罟寮專無望
嫁著散食翁　米甕定定攏空空
嫁著鱸鰻翁　心臟像咧磅米芳
嫁著跋筊翁　勤勤儉儉無彩工
嫁著風流翁　心情鬱卒袂輕鬆
嫁著䆀䆀翁　認真拍拚食袂空
娶著媠媠某　規暝免睏免穿褲
娶著賢慧某　較好三个天公祖
娶著有錢某　對著事業有幫助
娶著散食某　勤儉扞家好照顧
娶著貧惰某　食飽𨑨迌嫌艱苦
娶著跋筊某　定定出入拘留所
娶著刺查某　親像惹熊閣惹虎

臺灣民國歲次戊子年仲夏徐海連（笑長）

嫁著刣豬翁，煮菜無油嘛會芳。

嫁著刣豬翁，刀尾#通炒蔥。

嫁著曲痀仔翁，被內#風駛帆。

嫁著臭頭仔翁，半暝搝被掩(ng)鼻空。

四知：「天知、神知、我知、子知」

       往擺pat聽楊緒賢--先咧講古，伊講佇東漢个時，有一位荊州刺史楊震，做官个人品誠受眾人个尊重，甚至有「關西孔子」个美稱，有一改，伊个學生王密王本縣三更半暝來揣--伊，順紲(sīn-suà)紮十斤个金仔角來，來卜創省？恁逐个應該想會得kàu，就是參陳啟祥予林仔益世个彼六千三sâng款，卜來烏西(oo-se)--的，王密个先生楊震隨共伊講：「不可！」王密煞共楊震講：「現此(tsú)時三更半暝，也無人知影，是按怎buě用--得？」楊震應講：「天知、神知、我知、子知，何為不知？」予王密kāi-kī感覺真見笑，只好知難而退。只件事志無偌久就流傳出去--矣！後--來，楊姓个後嗣真濟計是用只个故典來做亻因个份頭（燈號），也就是一般人所知影个「天知、地知、你知、我知」，庶常看會著个「四知堂」或--者是「四知衍派」。

日本時代「毛斷」个寫真

 

      較早咧整理中山國校校史館个時，有注意著即款相片，逐个袂講徛甲真柴，或者是坐仔真四正，顛倒是kóo人有該己个phòo-sirh，看--起來就予人真有「毛斷(modern)」个感覺，真有新時代个氣氛。

　　左後方立者洪水柳先生為照片提供者洪文卿之父，洪為大正四年（1915）本科第12回畢業生，此照片為其任教本校時所照，後來他擔任彰化女子學校（今陽明國中）校長及戰後第一任教育科長（今教育局長）；中間蹲於石頭左後側者為戰後南郭（lâm-kok）第一任校長林水榮，右四坐於石頭上者為戰後中山第一任校長張銀坤，後排站於左邊第三位的是戰後平和第一任校長顏卿堯。

　　此照片攝於本校神社左側水池邊，後為八卦山，最上面隱約還可見到彰化溫泉浴場的建築物。

再次訪問人間國寶－陳萬能大師

紲接(suà-tsiap)遠流《鹿港深度旅遊》（2001）、彰化文化局《地方文化館導覽手冊》（2004），近來受國家文化總會《新活水》邀稿，事隔多年，再度前往「萬能錫舖」齪嘈(tsak-tsō)訪問人間國寶陳萬能錫藝大師，受著萬能司以及四公子志昇个熱情款待，銘感於心，無疑悟卜相辭个時，閣得著一罐萬能司个記念酒，真是意外之喜。

世界母語日

下今仔(e-kiann-a)是221世界母語日(International Mother Language Day)，tse是一个促進母語傳播kap語言、文化多樣性ê運動，因為咱只粒地球大部份ê言語一日一日當咧死失，世界母語日ê目的就是欲來向天跤下ê逐人宣傳保護言語ê重要性。   

221世界母語日源自1952年ê「孟加拉(Bengal)言語運動」，佇1947年印巴分治─巴基斯坦(Pakistan)uì印度獨立了後，巴基斯坦政府所管轄ê東巴基斯坦（嘛號做東孟加拉），佇文化、地理kap言語只幾个方面，計kap西巴基斯坦有真大ê爭差。1948年，巴政府共烏爾都語(Urdu)成做巴基斯坦唯一ê官方言語，致使東巴基斯坦發生大規模ê抗議活動。1952年2月21日，達卡(Dhaka)ê大學生為著欲爭取孟加拉語(Bengali)ê言語權行上街頭，煞予軍警開銃拍--死，國際社會共只陣犧牲者叫做「語文烈士」。經過幾落年ê衝突了後，巴基斯坦政府佇1956年，tsiah共孟加拉語提升做官方言語。孟加拉言語運動佇孟加拉產生真重大ê影響，伊促進孟加拉語佇文學kap文化上ê發展，並且變做孟加拉獨立運動ê先行者。

聯合國教科文組織(UNESCO)佇1999年提出倡議，決議uì 2000年開始，共每一年ê二月二一訂做「世界母語日」。

汝敢有了解二二八？

二二八又閣予逐家趁著一日个歇睏日--矣！毋拄汝敢真正有了解著今仔日為啥乜卜放假？官廳機關為何今仔日愛降半旗？

 

二二八受難者家屬、大眾電腦董事長簡明仁pat講過按呢个話：「真濟人無二二八即款經驗，會當用真輕鬆个態度來認定歷史个巨輪必須向前繼續滾動，應當共過去放袂記、展望將來，但是大部分个人並無瞭解，對受難者个家屬來講，即件代誌猶無完全過--去，因為家屬猶閣活佇即內底，大部分受難个家庭並無復原。我向望會當真真正正來走揣出歷史全部个真相，還前輩清白，因為只有瞭解真相，誠懇來面對真相，才會當來原諒過去个錯誤。」

臺北市永建國小世界母語日宣導活動

       即站仔𡨞(tshím)開學，真正是無閒𩑾𩑾(tshih-tshih)，無法度認真來準備今年母語日个宣導活動，只三个學生囡仔從提著稿到上臺表演，算算--个猶無超過一對時（二四點鐘），算是表現甲袂䆀--囉！因為是正港个臺北囡仔，所致tsióng-ê無輾轉个臺語，也反映出現主時大部分臺北囡仔个臺語程度。

要求「過動兒」轉學

只兩日，即篇文章佇網路頂真時行。

佇國外，若是遇(bǔ)著像即位母親个狀況，因為是家己个囡仔無法度適應學校生活，多數是家己轉學，真少人像伊按呢，講想卜要求「過動兒」轉學。參「過動兒」做陣生活，窮實是囡仔出社會進前，真重要个一个學習過程。

即位阿母甚至共囡仔佇學校規日攏講臺語个情形，講是一種怪異个舉動，莫怪伊會去予網路頂个一寡友志排斥(pâi-thik)講，今仔日即位「過動兒」若是規日攏講英語，huān-tann伊會要求怹查某囝著盡量參伊行較倚(uá)--个，完全袂去想著伊是過動兒个身分。

 

http://www.babyhome.com.tw/mboard.php?op=d&sID=4065422&bid=6&r=310&p

愛號英語名个民族

真心適个文章，伊講全世界差不多干焦臺灣、中國、韓國、新加坡則有tsióng-ê愛號英語名个情形，尤其咱臺灣現主時个學生囡仔，佇學校上英語課定著愛有一个「英語名」，汝若毋捌，先生嘛會凊采撿一个仔Mary、Joe，通好來點名。

從早，參我有熟姒(si̍k-sāi)个朋友可能知影，我以早有用一个英語名「Isiah」，會號只个名个緣故，是因為學生時代真痟NBA个Isiah Thomas，路尾去補習班上英語課个時，煞定定去予外國先生問講，我是毋是Christian？真趣味。

自從開始沐(bak)白話字，我嘛拍算卜來去共我護照个名改做Khoo Ka-iong，為著即件代誌，前一站仔，我參我一位研究所个先輩(se̋n-pái)諍甲卜死，伊就若像即篇文章咧探討个對象，認定號一个英語系國家所慣稱个「英語名」則是正範，我就共黜(thuh)講，日本人、南洋个唐人嘛無像伊講个按呢。

tsióng-ê戰後則開始時行个現代性問題，有影參唐人kāi-kī个自卑性有關係。咱應該對kāi-kī有自信，勇敢用母語講出咱kāi-kī个名，無論是用漢字猶是羅馬字。

原文文章个連結：http://www.ettoday.net/news/20120604/52748.htm

四書五經讀透透，毋捌黿鼇龜鼈竈。

四書五經讀透透，毋捌黿鼇龜鼈竈。

Sìr/Sù-sir/su/si Ngóo-king tha̍k thàu-thàu, m̄-pat/bat guân ngôo ku pih tsàu.

公視真讚个臺語新聞，看新聞閣會用得學俗語。

只位旁口記者个南臺灣漳腔真明顯，親像上(tsiōnn)千字、文章(tsionn)，不而過，嘛是有讀毋著个所在，可比講閱讀个"tho̍k"讀做"to̍k"，內容个"iông"讀做"liông"。啊若講著上大个誤讀，彼就是許雅文共「竈(tsàu)」--字讀做"tsáu(走)"，有影是一丈差九尺。

POJ（LMJ）vs. 漢字

       白話字（POJ/LMJ）毋是臺語个專利，漢字嘛毋是華語个專利，POJ（LMJ）參漢字計是語言書寫个一款符號，就親像高盧人（Gaul）使用LMJ來做France个書寫，日耳曼人（Germanic peoples）使用LMJ來做Germany个書寫，盎格魯撒克遜人（Anglo-Saxons）使用LMJ來做English个書寫，西哥德人（Visigoths）使用LMJ來做Spain个書寫，所致English是LMJ个一種，毋拄LMJ並無等於English；日本人、朝鮮人、越南人、臺灣人、中國人、廣府人、客人攏用「漢字」來書寫，Mandarin是漢字箍仔个一部分，毋拄漢字並無等於Mandarin。

　　總講--一句，咱對「漢字」參「POJ（LMJ）」个態度，應當是愛共伊當做一種國際性个書寫符號（International character），或者是一種國際性个書寫系統（writing system）。

台灣設計蔣

tsióng-ge「台灣設計蔣」个比賽，竟然是卜叫人以臭頭仔个夫妻生活為主題，來表達翁仔某恩愛个家庭教育，老蔣个迄陣大某細姨，聖拄聖(siànn-tú-siànn)參只个活動个主題相倒反(puínn)，實在是一个「不答(tap)不七、無七無八、阿沙不魯(a-sa-put-luh)」个活動。

鹿港文開詩社台語班宿題〈興啥物〉

只一篇文稿是鹿港已故先賢粘錫麟先生指導 ê 作品，文末有註明作者群：施嫣、黃鳳英、粘麗淑、吳明政、莊永塘、許梅麗，內容寫了野飭(iá thik)！可惜袂曉用羅馬字來拼音，用「ㄅㄆㄇㄈ」个注音符號來標音，往往是無遐爾kàu-kah(kàu-kak)，漢字个稽考嘛猶真有討論个空間，總--是，內容真心適、用詞嘛真端的(tuan-tiah)，趣味趣味！

江翠國中老樹叢 vs. 生命教育

        目今，學校个輔導教育強烈推捒「生命教育」，即位退休老師講了真siak(sak)-phah，敢講所說个性命教育干焦是佇學堂內放sí-ti予囡仔看就準會得過？面對目睭前即大片樹叢个性命，咱是抱著啥款个態度、選擇啥款个行動，啥乜號做「生命教育」，敢著閣加講！

        真正愛向江翠國中个先生(sian-sinn // sin-senn)致敬，怹學校佇2008年个校務會議，老早就已經以116票贊成、無半票反對，全數通過停止籌建游泳池參地下停車場，而且組織「護樹志工隊」來長期守護只大片樹叢。

　　結局因為咱全國老百姓个辛勞(sin-lô)（全民公僕）興泅水，教育部亄(it)著愛有起游泳池个業績，閣加上枋橋都會區个開發壓力，致使官廳均都(kun/kin-tu)愛來完成只个khè-sirh(case)个造作(tsō-tsok)。

　　不才也兼任過臺北市國校仔四學年度个體育組長，講一句較失禮--个，無一間學堂會歡喜卜來起造游泳池，因為卜營運是足辛苦--个，常常是「生食都無夠--矣！卜哪有通曝乾？」，入不敷出。

　　逐个若有認同，請恁做陣來連署，相合(sann-kap)來保護咱都市罕得有个只一大片老樹叢。

山頂鷓鴣薑，海內馬加象，一跡講一樣，離鄉不離腔。

下昏暗精實(siann-si̍t)是一个精采个會議，佇潘科元先生(屏東萬丹人)个主持之下，來自五湖四海个臺語/泉州話/漳州話/廈門話/福建話个武林高手，做伙來開講、相合(sann-kap)來研究，真真正正是一个語言个活教材，佇tsirâ，汝會用得聽著林建輝先生个海澄漳州話(毋拄伊多數是說廈門話)、蕭國个晉江東石泉州話(ue21)、駱振威个北馬福建話(ua21)、André Chen來自Canada个Hokkien、邱智偉个臺北大龍峒同安腔、張淑貞小姐个彰化和美泉腔、張翠苓小姐个彰化田尾話、李秀美小姐个屏東恆春話、林裕凱先生个臺北坪林泉腔、莊文龍先生个宜蘭腔、許世南先生个新竹話、蔡詠淯先生个臺灣普通腔、Tilly蔡小姐來自日本東京个連線……，益閣有我tse半桶師个鹿港話，汝講有心適--無？

現實个社會，社會个現實

有錢，叫你董(táng)--个；無錢，叫汝等(tán)--个。

有錢，啉威士忌(uí-si̍rh-kì)；無錢，啉維士比(uí-si̍rh-pì)。

有錢，講話大聲；無錢，講話無人聽。

有錢，看病免排；無錢，破病等埋(tâi)。

有錢，駛車免牌；無錢，駛車就害。

有錢，山珍海味；無錢，無碗無箸(tī)。

有錢，逐家攏好；無錢，恁娘較好。

有錢，妝甲媠媠；無錢，穿甲若鬼。

茲原作是劉惠蓉老師所創作--个。
請看原版

~~~~現實社會~~~~     劉惠蓉   2009
有錢 叫你董个 ~ 無錢 叫你等个
有錢 啉威士忌 ~ 無錢 啉維士比
有錢 講話大聲 ~ 無錢 講話啥聽
有錢 看病免排 ~ 無錢 破病等埋
有錢 駛車囂俳 ~ 無錢 駛車悲哀
有錢 山珍海味 ~ 無錢 欠碗減箸
有錢 逐家攏好 ~ 無錢 恁娘卡好
有錢 妝甲媠媠 ~ 無錢 穿甲那鬼
不管有錢無錢 ~ 歡喜自在就好

有錢無錢，歡喜清閒，攏是好心情啦!  風颱天，祝福逐家平安、清心!
有錢、無錢，皆有無仝的煩惱，唯有知足蓋好！
知足、樂暢，無煩無惱，有閒來揣文字之寶，人生上快樂。