進步个民俗思維

20幾年前，阮鹿港个媽祖宮起一座新个停車場，離媽祖宮差不多有400米遠，外埔頭來進香、刈香、參拜个遊覽車，多數是共善男信女下佇tserâ，則閣予伊怙(kōo)步輦(pōo-lián)--个，行只條民生路到媽祖宮口，因為是大部分信徒會行踏个路草，致使即條民生路也吸引真濟生理人來tserâ排擔仔做買賣。

因為只條民生路拄搪(tú-tn̄g)佇文開國校个後壁面，20外年來，便若有進香團來參拜，鑼鼓聲、炮仔聲......庶常影響着文開國校个教學品質，尤其是像只站仔卜開始--矣个「三月痟媽祖」，文開國校甚至佇亻因个牆街貼出海報，詳細个文字我𣍐記--得--矣！大概是『祈求貴神明保佑的同時，也請尊重我們子弟的學習權益』。

只張相片是佇我現主時服務个學堂外口翕--个，是今年木柵(ba̍k-sa)忠順廟迎尪公(ang-kong)遶境(liáu-kíng)个新創舉，我感覺真好，真值得來推拺(tshui-sak)，是一種進步个民俗思維，『學校靜音區－請全體陣頭保持靜音通過』。