即位阿啄仔真𠢕(gâu)，知影臺語七聲个變調規則「5→7→3→2→1→7」、「4→8」、「8→4」、「4h→2」、「8h→3」，閣會用得提來做例講解英語个音標；毋拄人伊講了誠好，雖然伊共臺語个變調規則背--起來-矣！並無代表講伊會曉講臺語，並無代表講伊每一遍講--出來个臺語攏是正範--个，伊知影只个系統，伊去考試可能無問題，毋拄愛捷餾(tsia̍p-liū)、捷紡(tsia̍p-pháng)。
汝若是臺語母語(mother tongue)个人，汝毋知影只tsua̋i聲調是愛按怎變，汝用汝kāi-kī自然个方法就講--出來-矣！汝知影迄个聲音是按怎講--个，Ah汝共人講臺語就是按呢唸，莫去管許hua̋i數字，管待伊是佗一个聲調，汝按呢唸就著--囉-矣！毋拄對非母語个人卜來學一種新个語言，「規則系統」是非常重要--个！
外國來臺灣教英語个先生，伊參朋友開講是用怹口語个發音，伊教汝可能是用辭典个發音，因為伊卜汝學迄个正範个音；所致咱若毋知影茲(tse)內中个因端，咱學著个英語就定定毋是實際上英美語人个口頭語。