我感覺茲(tse)是一个「定義」參「光譜」个問題。
1.省乜(siánn-mih)號做「鹿港腔」？根據臺灣上早一份相對較精確个人口調查資料(1926)，鹿港街攏總有31,400人，其中，同安人佔2,200人、安溪人佔2,200人、三邑人佔26,800人、汀州人佔100人、興化人佔100人，斯當時統計資料个單位是百人，所致照講，鹿港話是以「三邑泉腔」為底蒂(tué-tì)个一種泉州腔。毋拄汝若是有機會踮鹿港參老歲仔人開講，真濟人攏有一種看法，也就是「北頭」參「街尾」个人講話就無sann-sâng--looh！「北頭」參「街尾」是鹿港街仔頂上北頂參上南爿个兩个角頭，差不多干焦有3 khí-looh遠niā-tiānn。
話閣講翻頭，「三邑泉腔」佇唐山，論真嘛是有「府城腔(西路腔)」參「海口腔(東路腔)」个分別，我轉去阮个祖居地龍湖鎮石龜瑤林，herâ个宗親並無央元音，毋拄阮俺公（來臺第七代）个央元音就真端的(tuan-tiah)，其中个因端真值得好好仔來究勘。
2.我是鹿港出世、鹿港大漢个鹿港囡仔，從到今(tsn̂g-kàu-tann)，有个人講我講話鹿港腔帶真重，嘛有人講我無省(siánn)鹿港腔，講第一句話个人有兩款，一種是對鹿港話有了解，一種是對鹿港話無了解，講第二句話个人sâng款嘛是有兩種，一種sâng款是對鹿港話有了解，一種sâng款是對鹿港話無了解。汝若問我kāi-kī个看法，我認為是光譜相對个問題，而且參觀察者本身對「鹿港話」了解个程度有關，我相對阮俺公，定着是較無鹿港腔--囉！毋拄我相對參我歲數差不多个鹿港人，我个鹿港腔算猶真牢腹。
1.省乜(siánn-mih)號做「鹿港腔」？根據臺灣上早一份相對較精確个人口調查資料(1926)，鹿港街攏總有31,400人，其中，同安人佔2,200人、安溪人佔2,200人、三邑人佔26,800人、汀州人佔100人、興化人佔100人，斯當時統計資料个單位是百人，所致照講，鹿港話是以「三邑泉腔」為底蒂(tué-tì)个一種泉州腔。毋拄汝若是有機會踮鹿港參老歲仔人開講，真濟人攏有一種看法，也就是「北頭」參「街尾」个人講話就無sann-sâng--looh！「北頭」參「街尾」是鹿港街仔頂上北頂參上南爿个兩个角頭，差不多干焦有3 khí-looh遠niā-tiānn。
話閣講翻頭，「三邑泉腔」佇唐山，論真嘛是有「府城腔(西路腔)」參「海口腔(東路腔)」个分別，我轉去阮个祖居地龍湖鎮石龜瑤林，herâ个宗親並無央元音，毋拄阮俺公（來臺第七代）个央元音就真端的(tuan-tiah)，其中个因端真值得好好仔來究勘。
2.我是鹿港出世、鹿港大漢个鹿港囡仔，從到今(tsn̂g-kàu-tann)，有个人講我講話鹿港腔帶真重，嘛有人講我無省(siánn)鹿港腔，講第一句話个人有兩款，一種是對鹿港話有了解，一種是對鹿港話無了解，講第二句話个人sâng款嘛是有兩種，一種sâng款是對鹿港話有了解，一種sâng款是對鹿港話無了解。汝若問我kāi-kī个看法，我認為是光譜相對个問題，而且參觀察者本身對「鹿港話」了解个程度有關，我相對阮俺公，定着是較無鹿港腔--囉！毋拄我相對參我歲數差不多个鹿港人，我个鹿港腔算猶真牢腹。