只篇文章咧講天跤下各種無sâng款个言語。
1.全世界上少有7,102種夭閣活跳跳个言語，其中，佇亞洲上濟種，有2,301種，非洲有2,138種，太平洋有1,313種，米洲有1,064種，歐洲上少，干焦有286種。
2.佇全球72億个人口裡(lǎi)底，將近三分兩个人講下底只12種言語：1.漢語Chinese，包括漢語个各種方言，計共13億9千萬人跤兜。2.印度斯坦語（印度-烏爾都語）Hindi-Urdu有5億8千外萬人。3.紅毛話English有5億2千外萬人。4.阿拉伯語Arabic有4億6千外萬人。5.大呂宋話Spanish有3億8千外萬人。6.西魯話Russian有2億5千外萬人。7.孟加拉語Bengali有2億5千外萬人。8.媽口(Má-káu)話Portuguese有1億9千外萬人。9.獨逸(To̍k-i̍k)話German有1億3千外萬人。10.日本話Japanese有1億2千外萬人。11.法蘭西話French有1億1千外萬人。12.以大利話Italian有6千7百外萬人。
只个統計共漢語Chinese算做是一種言語，若佇西方个言語學，話語互相無法度交流个話是language，毋是dialect，所致漢語Chinese論真是7種或--者是10種language，分別是官話Mandarin（包括晉語）、吳語（包括徽語）、湘語、贛語、粵語Cantonese（包括平話）、客話Hakka、閩語，其中，閩語閣分做閩南話Hokkien、閩東話、福州話（閩北）、閩中話、莆田話（莆仙），互相之間亦是無法度通交流，所致漢語Chinese照講會用得分做14種个language。
若照Wikipedia个記載，中國講官話个人（native speakers）有8億4千外萬人，吳語kap閩語各有7千外萬人，粵語kap平話加--起來有6千外萬人，晉語有四千外萬人，湘語kap客語各有3千外萬人。有資料寫講全世界講Hokkien个人有6千萬人跤兜（有个資料寫4400萬人），安爾凡當仔嘛會用排佇第十外名。
若共第一言語kap第二言語做伙濫咧統計，講大呂宋話个人口佔全世界个4.85pha，並4.83pha个紅毛話夭閣恰懸。
3.佇非洲、南亞kap東南亞，國家裡底个人民講無sâng款个母語个比例上懸。巴布亞新幾內亞Papua New Guinea是上譀--个，凊彩揣兩个人，兩人講無sâng母語个指數達夠98.8（100是滿點），若是佇米國，只个情形干焦有33pha个可能性。
4.真濟世界時行个言語是佇一个以上个國家咧奢颺，紅毛話排頭辦（101國），阿拉伯語排二辦（60國），應當是回教Muslim个因端，法國話排三辦（51國）。紅毛話、法國話kap大呂宋話會佇世界上楦甲遮爾闊，當然是kap往過个帝國主義有關係。
5.紅毛話是世界上上濟國家个官方言語（有35國），佇法律上，紅毛話並毋是英國、米國、澳洲个官方言語。一个國家雖然是共紅毛話當做亻因个官方言語，毋拄夭是有寡人實際上是用另外一種話咧互相交流，佇頂頭講--著个35个國家，有一寡仔國家个「英語母語人士」是干焦佔少數中个少數。
6.大多數个言語是干焦少數人咧講niā-tiānn，96 pha个言語屬佇3pha个人口，世界頂有2000種个言語干焦無夠1000人咧講，所致講世界上差不多有一半个言語會佇只个世紀底來死失。
米國个瀕危言語除了中西部个原住民保護區以外，主要分布佇西海墘。若照全球个範勢來看，Amazon雨林、Saharan沙漠以南个非洲、大洋洲、澳洲kap東南亞將會失去上濟个言語。
7.紅毛話是全世界上濟人咧學个言語（有15億人），第二濟--个是法國話有8千2百外萬人，閣來是漢語有3千萬人（可能是指現代中文Mandarin）、大呂宋話kap獨逸話各有1千4百外萬人、以大利話有8百萬人、日本話有3百萬人。
佇1990-2013年，米國个大學教現代中文个比例提升11成，sâng只个時陣，提供西魯話个課程煞下降三成。
有寡言語有無在額个價值，可比講佇米國，汝若有法度講獨逸話，會用得加趁12萬8千箍个米金，獨逸話个價值是法國話个兩倍，是大呂宋話个三倍。